මට බැහැ /මගෙ හැටි එහෙමයි

 කුඩා කල පටන් හැදුනු වැඩුනු පරිසරය,කියවපු පොතපත, ගුරුවරු, දෙමව්පිය සහ වැඩිහිටියන්ගෙ අදහස් යෝජනා ආදියේ නිෂ්පාදනයක් වන වැඩිහිටි මනුෂ්‍යයා "මම" යනුවෙන් හදුන්වන්නෙ ස්වකීය සිතින් දැඩිව ග්‍රහණය කරගෙන සිටින සිතුවිල්ලකි.

මෙසේ දැඩිව යටි සිතට කිදා බැස ඇති සිතුවිලි "මම" යනුවෙන් ඔහු හැදින්වූවත් ඒ ගැන සත්‍යය දැන ගැනීමට ඕනෑ කරන අයද අප අතර සිටී.වැඩි දෙනෙකු තමන් සිතින් අල්ලා ගෙන සිටින වැරදි සිතුවිලි අත්හැරීමට වඩා අල්ලාගෙන සිටීමෙන් විනෝදයක් ලබයි. එසෙ නැති අය තමා බැදී සිටින බලවත් මානසික බන්ධනවලින් මිදීමට නොහැකිව ළතවේ.

මා සදහන් කල මානසික බන්ධනවලට උදාහරණ බලමු.කෙනෙකු තමා ගැන විස්තරයක් කරනවිට පවසන කරුණු කෙරෙහි සැලකිලිමත් වන්න.

"මට ඉදිරියට යන්න බැහැ,මම හරිම කම්මැලි,මට හරි ලැජ්ජයි,මම හරි අමුතුයි,මගෙ හිතට බයක් දැනෙනව " මේ විදියට කියන අය මෙන්ම මෙයට වඩා වෙනස් අයුරකින්" මම හරි කෙලින්,මම හරි අවංකයි, මම බොරුවට බය වෙන්නැහැ " ආදී වශයෙන් පවසන අයද සිටිති. අද සමාජයේ වැඩි හරියක් සිටින්නේ ඉහතින් කී විදියට තමා ගැන රින වේග නිකුත් කරමින් කාලය ගෙවන අයයි.

යම් කෙනෙකු "මම දුර්වලයෙක්" යන අදහස සිත්හි දරාගෙන සිටින තුරු එම දුර්වලකමින් ගොඩ ඒමට ඔහුට නොහැකිය. ඔබේ එම තීරණය වෙනස් කරන්න.එවැනි තීරණ මිත්‍යයා විශ්වාසය මිස සත්‍යය නොවේ.යමෙකු තමා ගැන ඒ විදියේ නරක හැදින්වීම්, හැදුනුම්පත් හෝ ලේබල් ගසා ගෙන සිටින්නෙ නිතරම අන් කෙනෙකු විසින් පවසන ලද අදහසක් තමන්ගෙ සිත තුල කවා ගැනීම නිසාය.  ඔබ ගැන ඔබේ තීරණය බොහෝ විට ඔබේ නොවේ. " මගේ හැටි එහෙම තමයි, මමත් ඒ වගේමයි,මං කවදාවත් එහෙමයි, මගේ හැටි වෙනස් කරන්න බැහැ" ඇදී වශයෙන් පවසන ඔබ එසේ කරන්නෙ මනෝවිද්‍යා ඉගැන්වීම් ගැන නොදන්නාකමිනි.

ඔබේ හැටි ඔබට ඕනෑ නම් වෙනස් කරගත හැකිය.ඔබට වෙනස් කර ගන්නට අවංක ඕනෑකමක් නැති නිසා ඔබ බොරු කියන්නේහිය. අප කාලයක් මිත්‍රකම්න් ඇසුරු කල "හිතමිතුරකු වැනි නරක ගතිගුණයක් අපෙන් තුරන් වී යනවාට අපි කැමති නොවෙමු. අන්න ඒ හේතුව මත ඇත්ත නොකියා "ඒ මගෙ හැටි " යයි පවසා ඒ වෙලාවට ප්‍රශ්නයෙන් මිදීමට බුද්ධි හීනයා ඉදිරිපත් වේ.

අපි නිතර නිතර සිතන සිතුවිලි අනුව අපේ මොළයෙ මෝස්තරයක් ඇදේ. ඉන්පසු ඒ මෝස්තරයෙන් පිට වෙනත් දෙයක් සිතීම අපහසු වන්නේය.කලාතුරකින් කෙනෙක් දැඩි වෑයමකින් පසු පැරණි මෝස්තරයට පටහැණිව අලුත් දෙයක් ගැන සිතයි. එහි ප්‍රතිඵලයක් වශයෙන් පුද්ගලයා නව චින්තනයකට නැඹුරු වේ. කෙනෙකු හොද හෝ නරක පුරුදුවලට ඇබ්බැහිවීම හා ඒවායින් අත්මිදීම සිදුවන්නේ පෙර කී අන්දමටයි.