තම දූ දරුවන්ට දෙමාපියන් දක්වන ආදරය අති විශිෂ්ඨය. පක්ෂීන් හා සියලූ තිරිසන් සත්වයෝද තම පැටවුන් රැක බලා ගන්නේ තම පණටත් වඩා දැඩි ආදරයකිනි. මනුෂ්යයෝ පමණක් තම දරු පැටවුන්ගෙන් පෙරළා තමන්ටද ආදරය කිරීම අපෙක්ෂා කරති. ආදරය දැක්විය යුත්තේ ආදරය අපේක්ෂාවෙන් නොවේ. ආදරයට කිසිම අපේක්ෂාවක් නැත.
දෙමාපියන් තම දූ දරුවන්ට හොද අනාගතයක් ලබාදීමට ඔවුන්ගේ කුඩා අවදියේ පටන්ම සැලසුම් කරති. හොඳ පාසලකට ඇතුලත් කිරීම, නීරෝගීකම සමග කෑමබීම හා ඇදුම් හා පැළදුම් ගැන දෙමාපියෝ දක්වන සැලකිල්ල ඉමහත් ය. එහෙත් මේ සියල්ලම සමග දරුවන්ගේ මානසික සවි ශක්තිමත් කිරීමද අත්යාවශ්යවේ. එය නිවසින් ආරම්භ කළ යුතුය. දරුවන්ට සැබෑ ආදරයක් ඇත්නම් ඔවුන් පුංචිකර, බයකර හකුලුවා තැබීම වැරදිය. කීකරු කම තමන්ට වඩා උතුම් අය කෙරෙහි දක්වන ගෞරවය යි.
ඔබේ දරුවා ඔබට ගෞරව කරන්නේ දඩුවම් කරන නිසා නම් එය ගෞරවයක් නොව බියකි. දෙමාපියන්ට හෝ වෙන කිසිම කෙනෙකුට ඔබේ දරුවා තුල බියක් රෝපණය කිරීම පුරාණ වැදි යුගයේ අවශ්යතාවයක් විය. අද එය අවශ්ය නැත. සැබෑ ආදරය ලබන්නට නම් සැබෑ ආදරය දැක්විය යුතුය. තරවටු කිරීම, ශාරීරික වද දීම, ටොකු ඇනීම හෝ කෝටුපාර දීම සිංහල රජකාලේ ක්රියාවන් ය. අප ජීවත්වන මේ යුගයේදි අප කළ යුත්තේ තමන්ගේ ගෞරවය ආරක්ෂා කරගෙන දරුවන් කීකරු කර ගැනීමය.
මගේ ගෞරවය රැකෙන්නේ මම අවංකවූ තරමටය. බැරි දේවල් හෝ තමන්ට ඉක්මනින් කළ නොහැකි යමක් පවසා දරුවන් මුලා කිරීම නිසා, ඔවුන් තමන්ට දක්වන ගෞරවය පළුදු වන්නේය. එවිට දරුවන්ද බොරු කීමට දෙමාපියන්ගෙන් ඉගෙන ගනිති. දරුවන්ට ඔබ කෙරෙහි දැඩි විශ්වාසයක් තැබිය හැකි විය යුතුය. කුමන හේතුවක් නිසා හෝ ඔබ ඔවුන්ට නොසළකා සිටීම වැරදිය. ආදරය දිනා ගන්නේ ආදරය දැක්වීමෙනි. දුක සැප විමසා අඩුපාඩු ඉටුකිරීම, දරුවන්ගේ ලපටි සිත් නොරිදවීම, ළමා අදහස් උදහස් ගැන තම තමන්ගේ දියුණු දැඩි මානසික තත්ත්වයෙන් නොව ළමා මානසිකය අනුව තමාද මොහොතකට ළමයකුවී සිතා බැලීම සමග වැරදිවලට හා අඩුපාඩු කම්වලට සමාවදීම කළ යුතුය. වැඩි දෙනා කරන්නේ වැරදි වැරදි නිවැරදි කර ගැනීමට හෝ අඩුපාඩුකම් හා දුබලකම් ජය ගැනීමට දරුවන්ට උදව් කිරීම වෙනුවට ඔවුන්ට සිනහවීම, දරුවන් පුංචි මෝඩයන් ලෙස තීරණය කිරීම හා සමච්චල් කිරීමය. දෙමාපිය දෙදෙනා දෙයාකාරයකට දරුවන්ට සැලකීම නිසා ආණ්ඩු පක්ෂය හා විරුද්ධ පක්ෂය මෙන් දෙපැත්තට කඹ අදින දරු කැලක් ගෙදරදී පුහුණුව ලබා සමාජයට පිවිසෙති.
දැන් ලෝකයේ චින්තන විප්ලවයක් ඉතා සාමකාමීව සිදුවීගෙන යන බව බොහෝ දෙමාපිය වැඩිහිටියන් නොදනිති. ඒ නිසා පැරණි ආගමික අදහස් හා ඉගැන්වීම් අනුව දිගටම ළමයින් හැඩගැස්වීමට යොමුවී ඇත. ආගමික පොත පත ළමයින් අතට පත්කර ඇත්තේ ඒවායේ ඇති විශ්වාස කළ නොහැකි අද්භූත ආශ්චර්යමත් විශ්ව කර්ම හාස්කම් සමගය. වැඩිකල් යෑමට පෙර භෞතික විද්යා සහ ජීව විද්යා වැනි විෂයන් හදාරන දරුවන්ට කුඩා කළ ඉගෙන ගත් බොහෝ දෙවල් බොරු නිසා ආගමික විශ්වාසය බිඳ වැටි යයි. ආගම් විරෝධීන් හා ත්රස්තවාදීන් බිහිවන්නේ බොරු ඉගැන්වීම් වලින් හෙම්බත්වී සිටින බැවිනි.
අපි ජීවත්වන මේ යුගයේ දෙමාපියන් මෙම යුගයට ගැලපෙන අන්දමේ කොටස් පමණක් දරුවන්ට උගන්වමින් බොරු අලංකාරය, වර්ණනාව හා අතිශයෝක්තිය ඉගැන්විය යුත්තේ ඒවා බොරු බව කියා දෙමිනි. එවිට අනාගතයට නොබියව මුහුණදීමට හැකි බොරු බියෙන් පුංචිවී නොහැකිලෙන පරපුරක් බිහිවනු නොඅනුමානය.
මනස සඟරාවෙන් උපුටාගත් ලිපියකි.
Comments
Post a Comment