කෙළවරක් නැති වැඩපලවලින් හෙම්බත්ව පිඩාවට පත්වී සිටීම, නුතන කාන්තාව කෙරෙන් දැකිය හැකි සාමාන්ය ලක්ෂණයකි. රැකියාවේ කටයුතුවලට අමතරව, ගෘහණියක් හා මවක් වශයෙන් පැවරෙන වගකීම්භාරයද නිසා, එදිනෙදා වැඩපලවල කලබලයෙන් හා කඩිමුඩියෙන් නිරත වන ඇයට මඳ වෙලාවක් විවේකිව, නිස්කලංකව හා ගත සිත සැහැල්ලුවෙන් තබා ගැනීමේ ඇති ඉමහත් ප්රයෝජනය ගැන සිත යොමු කිරීමටවත් කාලයක් නැත.
ගතසිත සැහැල්ලුවෙන් තබා ගැනීම යන්නෙන් බොහෝ දේ අදහස් කෙරේ. එක් අතකින් එය මානසික අසහනයෙන් හා අස්ථාන බියෙන් සිත මුදා ගැනීමකි. තවත් අතකින් කලබලකාරී අතරතුර කෙටි විරාමයක් ලැබීමකි. විවේකය තුලින් ඉමහත් ආශ්වාදයක් ද ලැබිය හැකිය. සුවදායක නින්දක්ද ලැබිය හැකිය.
ගතසිත සැහැල්ලුකර ගැනීමේ මාර්ග විවිධය. ක්රීඩාවක යෙදීමෙන් පුවත්පතක් හෝ පොතක් පතක් කියවීමෙන්, ගුවන් විදුලියට සවන්දීමෙන්, රුපවාහිනිය නැරඹීමෙන් හෝ එසේ නැතිනම් සිතට ඇතුල් වන විවිධාකාර සිතුවිලි වලින් මොහොතකට මිදී, හිත හිස් ස්වභාවයෙන් තබාගැනීමෙන් සිතේ තද ගතිය ලිහිල් කරගත හැකිය. ඒ හැම ක්රමයක්ම හොඳය. ඔබ තෝරා ගත් ක්රමය සැබවින්ම ක්රියාත්මක කරන්න එය සැබෑ විවේකයක් කරගත යුතුය. ඔබ එයින් විවේකිසුවය ලබන බව මෙනෙහි කරමින්, පීඩාකාරී සිතුවිලිවලින් සිත යලි යලිත් අවිවේකයට පත්වීමෙන් වලක්වා ගනිමින් එළඹ සිටි සිහියෙන් යුතුව විවේකය හා සැහැල්ලු ගතිය පිළිබඳව අවදියෙන් සිටිමින්, එයින් ආශ්වාදයක්, සුවයක් විඳින්න.
ඔබ රැකියාවක් කරන්නියක වුවත්, මවක් වුවත් සුළු වෙලාවක් හෝ විවේකය හා ගතසිත සැහැල්ලුවෙන් තබා ගැනීම සඳහා වෙන්කරමින් දවසේ කටයුතු සැලසුම් කර ගැනීම ඉතාම ප්රයෝජනවත්ය. උදැසන අවදිවිමෙදී අවසාන තප්පරය වනතුරැ බලාසිට ඇඳෙන් බිමට පනිනවාට වඩා විනාඩියක් දෙකක් කලින් අවදි වී සුළු විවේකයක් සඳහා කාලය ඉතිරි කර ගන්න. දරුවන් පාසල් යැවීමෙන් අනතුරුව මඳක් විවේකිව හිඳගෙන පුවත් පතකට නෙත යොමු කරන්න. පාන්දර සිට මුළුතැන්ගෙයි වැඩකිරීමෙන් ලද වෙහෙස මඳක් තුනී කරගැනීමට පස්වරුවේ කෙටි නින්දක් සඳහා මඳක් ඇලවෙන්න. එක දිගටම වැල නොකැඩි වැඩකරන වේලාවෙන් සුළු වෙලාවක් විවේකය සඳහා වැය කිරීම කාලය නාස්ති කිරීමක් නොව ඔබට පුදුම සහගත සුවයක් හා විවේකයක් ලබා දෙන මඟකි.
අසහනයෙන් සිත මුදවා ගැනීම සඳහා පුහුණුවක් අවශ්යය. ඇතැම් කාන්තාවන් සහජයෙන්ම ඍනවේග හා අසහනයන් සමඟම ජීවත්වීමට පුරුදු වී සිටීම නිසා, සිත එයින් මුදාගැනීම අසීරු වී තිබේ. ඔබත් එවැන්නියක් නම් මිට සතියකට උඩදී මහමේරු පර්වතය මෙන් ඔබේ හිස මත තබා ගෙන පීඩා විඳි ඇතැම් ප්රශ්න දැන් ඔබේ හිතෙන් කෙමෙන් කෙමෙන් අමතක වී යන බව ඔබට දැනේවි. මේ මොහොතේ ඔබව අසහනයට පත්කරමින් ඔබට වදදෙන ඇතැම් සිතුවිලි ක්රමක්රමයෙන් ඔබේ සිතෙන් මැකී යන අයුරු තව සතියකින් පමණ ඔබට දැනේවි. මීට අවුරුද්දකට පෙර ඔබව අසහනයට පත්කළ ඇතැම් සිතුවිලි දැන් ඔබට මතක නැත. එසේනම්, ඒවා ගැන තැවී තැවී ‘ඍන කොම්පැනි’ වීමෙන් ඇති පලේ කුමක්ද? අසහනයට හේතුවන කරුණු විග්රහ කර බලන්න. එයින් මිදීමට ඔබට කල හැකි දෙයක් තිබේදැයි විමසා බලන්න. අසහනයෙන් සිත මුදවා ගැනීමේ රහස එයයි.
සමාජ ඇසුර තුලින් ඔබ ලබන විවේකි සුවය කෙබදුද? බාහිර සමාජයේදී අනිකුත් අය ඔබගේ හැසිරීම හා ඉරියව් කෙරෙහි විමසිලිමත් වන්නේ යයි සිතමින් ඔබ පීඩා විඳිනවාද? එසේ නම් එය ඔබ ඔබගේ ඍන සිතුවිලි දෙසට අන්වීක්ෂයක් තුලින් හෙලු බැල්මකි. එවිට ඔබ පිළිබඳව ඔබවිසින්ම මවාගෙන සිටින සත්යයක් නොවන ඔබේම ප්රතිරූපය සිය ගුණයකින් විශාල වී ඔබට පෙනේ. එයින් ඔබ මුලාවේ. ඇතැම් විට බියට පත් වේ. එම පුරුද්ද අත්හරින්න.
කාන්තාවකගේ අභ්යන්තරික තද ගතිය හා වෙහෙසකාරී කනස්සලු ස්වභාවය ඇගේ ස්වභාවික ජේත්තුකාර ප්රසන්න පෙනුම කොතරම් විකෘති කරන්නේද යන්න, කැඩපතක් තුලින් තමාටම බලාගත හැකිය.
දිවංගත සුමනදාස සමරසිංහ ශූරීන්ගේ ලිපියක් අධාරයෙන් සැකසූවකි.
Comments
Post a Comment