විශේෂ අයකු වන්න...

යම් අංශයකින් දක්ෂ අයකුට දෙවියන් යයි කියමින් වැඳීම හා පිදීම පැරණි අයගේ සිරිත විය. එසේම බිහිසුණු අපරාධකළ අය ඈත අතීතයේදී හැඳින්වුයේ යක්ෂයින් ලෙසටය.

හොඳ හෝ නරක දෙයකට දක්ෂවූ පලියට හෝ බිය නැතිවූ තරමට එම පුද්ගලයාට වැඳීම පිදීම අද සිටින මිනිසා නොකරයි. අප අතර සිටින වීරයන් හා වීරවරියන් මනුෂ්‍යන් මිස භූත හෝ දේව ආත්මයන් නොවේ. ඔවුනට දේව හෝ භූත ආරූඪයන්ද නැත. එහෙත් අපට වඩා ඒ අය බැබලෙන්නේ මන්ද? අප ඒ අයට වඩා ගතිගුණ හෝ මොළය පාවිච්චි කරන විදියෙන් පහත් තත්වයක සිටින බැවිනි.

අපේ හිස්බව අප තේරුම් ගන්නේ නැත. අපි නිතරම බලන්නේ අපට වඩා උසස් අය තුළ ඇති හිස්බව පමණකි. එක අරමුණක් හා ඒ අරමුණ සාර්ථක කරගැනීමට අවශ්‍ය අධිෂ්ඨානය ඇති අයකු සාමාන්‍ය හිස් අය අතර කැපී පෙනෙන විශේෂ අයෙකි. එවැනි අයකු තුළ මිනිස් ගුණ ධර්ම අඩු විය හැකිය. ඔබ සිතා සිටින අන්දමේ ගුණ දහම් පුරන්නෙකු නොවන එම පුද්ගලයා තුළ ඇති සුවිශේෂ ගුණය ඔබ ළඟ නැත. එහෙත් ඔබ එය පිළිගැනීමට සුදානම් නැත.

ඔබට අරමුණක් තිබුණි. දැන් එය වෙන අතකට යොමුවී ඇත. ඉදිරිකාලය තුළ එය තව දහදොළොස් වතාවක් වෙනත් අරමුණු වලට මාරුවිය හැකිය. එසේ නම් ඔබට අරමුණක් තිබී නැත. අරමුණක් වෙනස් වන්නේ ඉෂ්ඨවීමෙන් පසුවය.

අරමුණ හා අධිෂ්ඨානය කෙනෙකු විශේෂඥයකු බවට පත්කරයි. මහජනයා එම විශේෂඥයා සුවිශේෂ අයකු ලෙස සලකන්නේ නොදන්නා අඥානකම නිසාය.

මෙය ලියන මා පුවත්පත් කලාවේදියෙකු ලෙස දීර්ඝකාලයක් සේවය කර ඇත්තෙමි. අපට අපේ සේවා කාලය තුළ අගමැතිවරු, ජනාධිපතිවරු හා රජවරු ඇතුළු ප්‍රභූන් මෙන්ම සුප්‍රසිද්ධ නළු නිලියන්ද හමුවී, මිත්‍රවී කතාබස් කරන්නට අවස්තාව ලැබී තිබේ. අප දෙස බලන අය සිතුවේ අපි ඉතා වාසනාවන්ත විශේෂ අය හැටියටය. එහෙත් අප මෙන්ම (ඇතැම් විට අපට වඩා) එවැනි ප්‍රභූන් සමඟ ඉතා කුළුපඟව සිටීමට ඒ උතුමන්ගේ නිවෙස් වල සේවය කළ සේවකාදීන්ටද ඉඩකඩ ලැබුණි. ඔවුන්ද අප මෙන් විශේෂ අයද?

වීරයන් පිදීම අන්ධානුකරණයකි. එයින් පුදන්නාට යහපතක් සිදුනොවේ. එහෙත් තමන්ද එවැනි වීරයකු වීමට අධිෂ්ඨාන කරගතහොත් එය ඉටුවීමට ඉඩ ප්‍රස්ථාවන් උදාවන්නේය.

ඔබේ සිත වැඩකරන අන්දම දැනගැනීමට වෑයම් කරන්න. බොහෝ විට තමන් හරියයි කියා සිතන හා තීරණය කරන සිතුවිලි වැරදි බව තමන්ට වටහා ගැනීමට බැරිය.

සිත සකස්කර ගැනීමට කරුණු විස්තර කරදීම පමණක් ප්‍රමාණවත් නොවන බව අවුරුදු පහළොවක් සිත ගැන කරුණු පැහැදිලි කරදුන් අයකු හැටියට මට කීමට පුළුවන. මානසික දුබලකම් ජයගැනීමට මාවෙත පැමිණි බොහෝ දෙනා දේශනයකට සවන්දී මානසික සුවයක් ලැබ පිටවී යති. එහෙත් තමන් පෙළෙන දුබල සිතුවිල්ලක් ජය ගැනීමට දේශනයකට සවන්දීමෙන් හෝ සාකච්ඡාවකට සහභාගිවීමෙන් නුපුළුවන. අතු කපාදමන ගසකින් නැවත අළුත් අතුරිකිලි පැන නගින්නාක් මෙන් දුබල සිතුවිලි වෙනත් වෙස් මුහුණු පැළඳගෙන තමන් පෙළන්නට වෙයි.

ඉරිසියාව, තණ්හාධිකකම හා අනාගත සුරක්ෂිතභාවය ගැන පහළවන බිය තමන්ගේ සිත පෙළන දුබලකම් ලෙස හඳුනාගත නොහැකිය. ඇතැම් කාන්තාවන් ඉහතකී විදියේ කපාදමන ලද අතු වෙනුවට අළුත් රිකිලි මතුවීම නිසා මානසික වේදනාවන්ගෙන් පෙළෙන රෝගීන් බවට පත්වී සිටිති.

දුබලකම් ජය ගන්නේ ඒවාට එරෙහිව නිතර නිතර පහළ කරගන්නා සිතුවිලි වල ආධාරයෙනි. පැන යෑමෙන් හා මුහුණ වසාගෙන සිටීමෙන් මානසික දුබලතා යටපත් කරගත නොහැක.

සුමනදාස සමරසිංහ ශූරීන්ගේ 

පසුගිය මනස සඟරාවකින් උපුටාගත් ලිපියකි.